و انتهت رحلة وهن على وهن و ابتدت احلى حياة هي حلوة بتجاربه و شعوره الجديد و التحديات اللي نواجه اللي تقوينا و نعرف قوتنا و نفسنا اكثر بداية التدوينة هذي احتمال ما راح تخدم الأمهات الخبرة و لكن افيدونا بما ترون انه مفيد الأمهات الجديدات مثلي ممكن نستفيد من بعض و نتعلم و الأهم التدوينة هذي توثيق للمرحلة الجميلة هذي من حياتي اللي احس انه بتمر بسرعه و اشتاق لأيامه و مشاعره المليانة

بداية كل التوقعات و الآمال حطيهم على جنب لين تعيشين اللحظة و تقررين تصرفك او وش بتسوين عشان ما تنصدمين مرات الواقع مختلف تماما عن خيالك بالذات كونه اول طفل لك

لا ترفعين سقف طموحك مع الأشخاص مهما كانوا حتى نفسك و طاقتك رفقا بها بتتعلمين حبه حبه بالهداوة و الحب بداية الرحلة تحسين صعوبة و قلق و ضغط كبير جدا طبيعي و مرحله بداية الاكتئاب طبيعية بس تعلمي كيف تتجاوزينه و تذكري ان كل شي بيعدي و يمشي بسرعه و كل صعب ربي بتوكلنا و دعانا يسهل الأسباب

تعايشي و حبي كل مرحله من مراحل طفلك مهما كانت تذكري انه بيكبر بسرعه و بتشتاقين لذي الأيام حسب من سبقونا بالأمومة و انه ما تتكرر حتى ما اخوانه كل طفل غير الثاني و ان ربي بكل اللي اعطاك بطفلك و حياتك يعرف انك تقدرين و تتحملين اللي عطاك

لو فيه مجال باي وقت او مرحله احد يساعدك ايا ما كانت هالمساعدة اطلبيه لو نص ساعه نوم إضافي

اذا نام سوي اللي بيريحك و يروقك مو شرط تنامين معه مرات انك تنجزين اشغال احسن لنفسيتك و مرات انك تسوين شي قديم من روتينك او تاكلين وجبه تحبينه

خوذي وقتك لين تعرفين طفلك و مع الوقت بتعرفين كل تصرفاته وش تعني جوع نوم حر ؟ كل ما جلستي معه اكثر و جربتي بتتعلمين اكثر و تذكري كل مره تخطين انتي تتعلمين شي جديد لا تقسين على نفسك تراك قريت مره مقوله اعجين احسه فعاله خوذي وقتك معه تتعرفين عليه مثل ما كنتي تتعرفين على ابوه اول الزواج وش يحب ووش يكره ما راح يجي بيوم و ليله

تذكري هو و احتياجاته اهم من كل شي

كل الاشياء الاجتماعية اللي ما انزل الله بها من سلطان وما تناسبك اسحبي عليه اهم شي راحتك و راحه البيبي

يكبرون بسرعه استمتعي بكل لحظه معهم

لا تخافين بزيادة على مراحل نموهم كل طفل له نموه الخاص فيه و بالمناسبة اقطعي فكرة المقارنة عدوة السعادة حتى لو المقارنه باخوه ركزي على تطوره هذا هو الاهم

حجمي و صغري مخاوفك وهمومك تجاهه هو يبي بالنهاية أهل سعداء قد ما يقدرون و لما تصغرينه تشوفين الموضوع كاملو اصفى لذهنك

اكثر جملة اعجبتن و اقنعتن مصيرهم باذن الله بيكبرون و بيسوون كل شي لا تستعجلين عليهم و بيتعلمون كل شي بوقته

راعي نفسيتهم التسنين و المهارات الجديدة اللي يتعلمونه ترهقهم و تأثر على اكلهم و نومهم

بسطي حياتك معهم حسب اللي يناسبك

الشغل ما يقضي و اليوم يقضي كلنا كذا لا تزعلين و يقولون فترة و تعدي و كل ما زاد اعتماده على نفسه زاد وقتك و مرات ينشغل بالك اكثر تنتقلين من الجهد البدني للذهني بس يطيلع لك وقت

حاولي قد ما تقدرين تعبين كوبك و طاقتك بشي يسعدك حتى لو بسيط بالبيت لحظه امتنان اكله تحبينه … الخ

انتِ مو روبوت انت الاساس و باقي الاشغال و الاشياء تضل اشياء

فكرة حلوة من كتاب نعمة الام السعيدة اذا ما قريتيه خليه اولوية و بتدعين لي نرجع للفكرة اللي نظام حياته كانت قبل سهر او ووقته توه يبدأ بالليل اختاري 3 ايام بالاسبوع تسهربن فيهم و الباقي نامي بدري عشان صحتك و نفسيتك و بنفس الكتاب قالت الجوال ما يكبر هم يكبرون عيشي يومك معهم قد ما تقدرين

اقري عن الوقت النوعي و طبقيه

ثقفي نفسك دائم بمجال التربية

دخلب الكتب بأول حياتهم و نوعي لهم بالكتب و شاركيهم قراءة القصص حسب عمرهم

كثير مواقف مستفزة ما تكون هي السبب بذاته يكون ضغط او تراكم اشغال او شغل بال زيادة و يكون الانفجار على هيئة هذا الموقف

وثقي اللحظات الحلوة فيديو و صورة قد ما تقدرين مرات يكونون هم الطاقه اللي تقويك باليوم